ವರ ಮುಹೂರ್ತದೊಳವರ ನೂರರು
ವರನು ಕೊಟ್ಟನು ಶಸ್ತ್ರವಿದ್ಯಾ
ಪರಿಣತರ ಮಾಡೆಂದು ದ್ರೋಣನ ಕೈಯಲಾ ಭೀಷ್ಮ
ಗರುಡಿ ಕಟ್ತಿತು ನೂರು ಯೋಜನ
ವರೆಯ ವಿಸ್ತಾರದಲಿ ಸಾವಿರ
ಕುರಿಯ ಹೊಯ್ದರು ಪೂಜಿಸಿದರಾ ಚದುರಚಂಡಿಕೆಯ (ಆದಿ ಪರ್ವ, ೬ ಸಂಧಿ, ೪೦ ಪದ್ಯ)
ತಾತ್ಪರ್ಯ:
ಶುಭಮುಹೂರ್ತವನ್ನು ನಿಶ್ಚಯಿಸಿ ನೂರ ಆರು ಬಾಲಕರನ್ನು ದ್ರೋಣನಿಎ ಒಪ್ಪಿಸಿ, ಇವರನ್ನು ಶಸ್ತ್ರವಿದ್ಯೆಯಲ್ಲಿ ನಿಪುಣರನ್ನಾಗಿಸು ಎಮ್ದು ಭೀಷ್ಮನು ಕೇಳಿಕೊಂಡನು. ಶಸ್ತ್ರವಿದ್ಯಾಭ್ಯಾಸಕ್ಕಾಗಿ ನೂರು ಯೋಜನ ವಿಸ್ತಾರವಾದ ಗರುಡಿಯನ್ನು ಕಟ್ಟಿದರು. ಚಂಡಿಕಾದೇವೆಗೆ ಸಾವಿರ ಕುರಿಗಳನ್ನು ಬಲಿಕೊಟ್ಟು ಪೂಜಿಸಿದರು.
ಅರ್ಥ:
ವರ: ಶ್ರೇಷ್ಠ; ಮುಹೂರ್ತ: ಸಮಯ; ಕೊಡು: ನೀಡು; ಶಸ್ತ್ರ: ಆಯುಧ; ವಿದ್ಯೆ: ಜ್ಞಾನ; ಪರಿಣತ: ಪಂಡಿತ, ತಿಳಿದವ; ಗರುಡಿ: ಅಭ್ಯಾಸದ ಮನೆ; ಕಟ್ಟು: ನಿರ್ಮಿಸು; ನೂರು: ಶತ; ಯೋಜನ: ದೂರದ ಅಳತೆಯ ಒಂದು ಪ್ರಮಾಣ; ವಿಸ್ತಾರ: ಅಗಲ; ಸಾವಿರ: ಸಹಸ್ರ; ಕುರಿ: ಮೇಷ; ಹೊಯ್ದು: ಹೊಡೆ; ಪೂಜಿಸು: ಆರಾಧಿಸು;
ಪದವಿಂಗಡಣೆ:
ವರ +ಮುಹೂರ್ತದೊಳ್+ಅವರ +ನೂರ್
ಅರುವರನು +ಕೊಟ್ಟನು+ ಶಸ್ತ್ರ+ವಿದ್ಯಾ
ಪರಿಣತರ +ಮಾಡೆಂದು +ದ್ರೋಣನ +ಕೈಯಲಾ +ಭೀಷ್ಮ
ಗರುಡಿ +ಕಟ್ಟಿತು +ನೂರು +ಯೋಜನ
ವರೆಯ +ವಿಸ್ತಾರದಲಿ +ಸಾವಿರ
ಕುರಿಯ+ ಹೊಯ್ದರು +ಪೂಜಿಸಿದರಾ +ಚದುರ+ಚಂಡಿಕೆಯ
ಅಚ್ಚರಿ:
(೧) ನೂರಾರು ಎಂದು ಹೇಳಲು – ನೂರರುವರು ಪದದ ಬಳಕೆ
ಕುಮಾರವ್ಯಾಸಭಾರತ 