ಅರಸ ಕೇಳೈ ಪಟ್ಟವದು ಹಿರಿ
ಯರಸನದು ಯುವರಾಜಪಟ್ಟವೆ
ಹರಿತನೂಜನೊಳಾಯ್ತು ಸೇನಾಪತಿ ಧನಂಜಯನು
ವರ ಕುಮಾರರು ಯಮಳರಲ್ಲಿಗೆ
ಹಿರಿಯ ಸಚಿವನು ವಿದುರನವನಿಪ
ಪರುಠವಿಸಿದ ಯುಯುತ್ಸುವನು ಸರ್ವಾಧಿಕಾರದಲಿ (ಗದಾ ಪರ್ವ, ೧೩ ಸಂಧಿ, ೭ ಪದ್ಯ)
ತಾತ್ಪರ್ಯ:
ಜನಮೇಜಯ ರಾಜ ಕೇಳು, ಧರ್ಮಜನಿಗೆ ಪಟ್ಟ, ಭೀಮನಿಗೆ ಯವುರಾಜ, ಅರ್ಜುನನು ಸೇನಾಧಿಪತಿ, ನಕುಲ ಸಹದೇವರೊಡನೆ ಪ್ರಧಾನಮಂತ್ರಿ ವಿದುರ, ಯುಯುತ್ಸುವಿಗೆ ಸರ್ವಾಧಿಕಾರವನ್ನು ನೀಡಿದರು.
ಅರ್ಥ:
ಅರಸ: ರಾಜ; ಕೇಳು: ಆಲಿಸು; ಪಟ್ಟ: ಅಧಿಕಾರ ಸೂಚಕವಾದ ಚಿನ್ನದ ಪಟ್ಟಿ, ಹಣೆಗಟ್ಟು; ಹಿರಿ: ದೊಡ್ಡ; ಅರಸ: ರಾಜ; ಯುವರಾಜ: ರಾಜನ ಉತ್ತರಾಧಿಕಾರಿ; ಹರಿ: ವಾಯು; ತನೂಜ: ಮಗ; ಸೇನಾಪತಿ: ಸೇನದ ಮುಖ್ಯಸ್ತ; ವರ: ಶ್ರೇಷ್ಠ; ಕುಮಾರ: ಮುಗ; ಯಮಳ: ಅವಳಿ; ಪರುಠವಿಸು: ಸಿದ್ಧಗೊಳಿಸು; ಸಚಿವ: ಮಂತ್ರಿ; ಅವನಿಪ: ರಾಜ; ಅಧಿಕಾರ: ನಡೆಸುವ;
ಪದವಿಂಗಡಣೆ:
ಅರಸ +ಕೇಳೈ +ಪಟ್ಟವದು +ಹಿರಿ
ಅರಸನದು +ಯುವರಾಜಪಟ್ಟವೆ
ಹರಿ+ತನೂಜನೊಳಾಯ್ತು+ ಸೇನಾಪತಿ +ಧನಂಜಯನು
ವರ +ಕುಮಾರರು +ಯಮಳರಲ್ಲಿಗೆ
ಹಿರಿಯ +ಸಚಿವನು +ವಿದುರನ್+ಅವನಿಪ
ಪರುಠವಿಸಿದ+ ಯುಯುತ್ಸುವನು+ ಸರ್ವಾಧಿಕಾರದಲಿ
ಅಚ್ಚರಿ:
(೧) ಅರಸ, ಹಿರಿಯರಸ – ಅರಸ ಪದದ ಬಳಕೆ
ಕುಮಾರವ್ಯಾಸಭಾರತ 