ಜೀಯ ನಿಮ್ಮಡಿಗಳಿಗೆ ಗುರು ಗಾಂ
ಗೇಯ ವಿದುರಾದಿಗಳು ಹೇಳಿದ
ಜೋಯಿಸವ ಕೈಕೊಂಡಿರೇ ನಮ್ಮೀ ಪ್ರಳಾಪದಲಿ
ರಾಯ ಫಲವೇನೈ ಯುಧಿಷ್ಠಿರ
ರಾಯನೊಲಿದಂತಿರಲಿ ನಿಮ್ಮಯ
ತಾಯಿತಂದೆಗೆ ಹೇಳ್ವೆನೇನನು ಬುದ್ಧಿಗಲಿಸೆಂದ (ಗದಾ ಪರ್ವ, ೩ ಸಂಧಿ, ೩೪ ಪದ್ಯ)
ತಾತ್ಪರ್ಯ:
ಸಂಜಯನು, ನನ್ನ ಪ್ರಲಾಪಕ್ಕೆ ನಿಮಗೆ ದ್ರೋಣ, ಭೀಷ್ಮ, ವಿದುರರು ಹೇಳಿದ ಭವಿಷ್ಯಕ್ಕಾದ ಗತಿಯೇ ಬಂತೇ? ಹೇಳಿ ಏನು ಫಲ, ಯುಧಿಷ್ಠಿರನು ತನಗಿಷ್ಟಬಂದಂತೆ ಇಅಲಿ. ನಿಮ್ಮ ತಂದೆತಾಯಿಗಳಿಗೆ ಏನು ಹೇಳಲಿ? ತಿಳಿಸಿರಿ ಎಂದು ಕೇಳಿದನು.
ಅರ್ಥ:
ಜೀಯ: ಒಡೆಯ; ಅಡಿ: ಪಾದ; ಗುರು: ಆಚಾರ್ಯ; ಗಾಂಗೇಯ: ಭೀಷ್ಮ; ಆದಿ: ಮುಂತಾದರು; ಜೋಯಿಸ: ಜೋತಿಷಿ; ಪ್ರಳಾಪ: ಅಸಂಬದ್ಧವಾದ ಮಾತು, ಪ್ರಲಾಪ; ರಾಯ: ಒಡೆಯ; ಫಲ: ಪ್ರಯೋಜನ; ರಾಯ: ರಾಜ; ಒಲಿ: ಒಪ್ಪು, ಸಮ್ಮತಿಸು; ತಾಯಿ: ಮಾತೆ; ತಂದೆ: ಪಿತ; ಬುದ್ಧಿ: ತಿಳಿವು, ಅರಿವು;
ಪದವಿಂಗಡಣೆ:
ಜೀಯ +ನಿಮ್ಮಡಿಗಳಿಗೆ +ಗುರು +ಗಾಂ
ಗೇಯ +ವಿದುರಾದಿಗಳು +ಹೇಳಿದ
ಜೋಯಿಸವ +ಕೈಕೊಂಡಿರೇ +ನಮ್ಮೀ +ಪ್ರಳಾಪದಲಿ
ರಾಯ +ಫಲವೇನೈ +ಯುಧಿಷ್ಠಿರ
ರಾಯನ್+ಒಲಿದಂತಿರಲಿ +ನಿಮ್ಮಯ
ತಾಯಿ+ತಂದೆಗೆ +ಹೇಳ್ವೆನ್+ಏನನು +ಬುದ್ಧಿ+ಕಲಿಸೆಂದ
ಅಚ್ಚರಿ:
(೧) ಜೀಯ, ರಾಯ – ಸಾಮ್ಯಾರ್ಥ ಪದ
(೨) ತಿಳಿಸಿ ಎಂದು ಹೇಳುವ ಪರಿ – ಬುದ್ಧಿಗಲಿಸೆಂದ