ತರುಣಿಯೊಡಗೊಂಡೊಯ್ದು ಕನ್ಯಾ
ಪರಮಭವನದಲಾ ಮುನಿಯನುಪ
ಚರಿಸಿದಳು ವಿವಿಧಾನ್ನ ಪಾನರಸಾಯನಂಗಳಲಿ
ಹರಮಹಾದೇವೀ ಮಗುವಿನಾ
ದರಣೆಗೀ ವಿನಯೋಪಚಾರಕೆ
ಹಿರಿದು ಮೆಚ್ಚಿದೆನೆಂದು ತಲೆದೂಗಿದನು ದೂರ್ವಾಸ (ಆದಿ ಪರ್ವ, ೩ ಸಂಧಿ, ೧೫ ಪದ್ಯ)
ತಾತ್ಪರ್ಯ:
ಕುಂತಿಯು ದೂರ್ವಾಸನನ್ನು ಕನ್ಯಾಭವನಕ್ಕೆ ಕರೆದುಕೊಂಡು ಹೋಗಿ ನಾನಾವಿಧವಾದ ಆಹಾರಗಳು, ರಸಾಯನಗಳು, ನೀರು ಮೊದಲಾದವುಗಲನ್ನು ಕೊಟ್ಟು ಉಪಚರಿಸಿದಳು. ದೂರ್ವಾಸನು ಆಕೆಯ ಆದರ, ವಿನಯ, ಉಪಚಾರಗಳಿಗೆ ಬಹಳವಾಗಿ ಮೆಚ್ಚಿ ತಲೆದೂಗಿದನು.
ಅರ್ಥ:
ತರುಣಿ: ಯುವತಿ, ಹೆಣ್ಣು; ಒಯ್ದು: ಕರೆದುಕೊಂಡು ಹೋಗು; ಕನ್ಯಾ: ಹೆಣ್ಣು; ಪರಮ: ಶ್ರೇಷ್ಠ; ಭವನ: ಆಲಯ; ಮುನಿ: ಋಷಿ; ಉಪಚರಿಸು: ಸೇವೆಮಾಡು; ವಿವಿಧ: ಹಲವಾರು; ಅನ್ನ: ಊಟ; ಪಾನ: ಕುಡಿಯುವ ದ್ರವ, ಪೇಯ; ರಸ: ಸಾರ; ಮಗು: ಚಿಕ್ಕವ; ಆದರಣೆ: ಸತ್ಕಾರ; ವಿನಯ: ಒಳ್ಳೆಯತನ; ಉಪಚಾರ: ಸತ್ಕಾರ; ಮೆಚ್ಚು: ಹೊಗಳು; ತಲೆದೂಗು: ಒಪ್ಪು; ಹಿರಿದು: ಹೆಚ್ಚು;
ಪದವಿಂಗಡಣೆ:
ತರುಣಿ+ಒಡಗೊಂಡ್+ಒಯ್ದು +ಕನ್ಯಾ
ಪರಮ+ಭವನದಲ್+ಆ+ ಮುನಿಯನ್+ಉಪ
ಚರಿಸಿದಳು +ವಿವಿಧ+ಅನ್ನ+ ಪಾನರಸ+ಆಯನಂಗಳಲಿ
ಹರ+ಮಹಾದೇವ +ಈ +ಮಗುವಿನ್
ಆದರಣೆಗ್+ಈ+ ವಿನಯ+ಉಪಚಾರಕೆ
ಹಿರಿದು +ಮೆಚ್ಚಿದೆನೆಂದು +ತಲೆದೂಗಿದನು +ದೂರ್ವಾಸ
ಅಚ್ಚರಿ:
(೧) ಕುಂತಿಯ ನಡತೆಯನ್ನು ಹೊಗಳಿದ ಪರಿ – ಹರಮಹಾದೇವೀ ಮಗುವಿನಾದರಣೆಗೀ ವಿನಯೋಪಚಾರಕೆ
ಹಿರಿದು ಮೆಚ್ಚಿದೆನೆಂದು ತಲೆದೂಗಿದನು