ತಿರುಗಿದಳು ಬಲದಿಂದಲಾನೆಗೆ
ಕರವ ನೊಸಲೊಳು ಚಾಚಿ ದಿಗುಪಾ
ಲರಿಗೆ ಮಣಿದಳು ಮುನಿಜನಕೆ ಕೈಮುಗಿದು ಹರುಷದಲಿ
ವರರತುನಮಯ ತೊಟ್ಟಿಲಲಿ ಕು
ಳ್ಳಿರಲು ತೆಗೆದರು ಗಜದ ಮೇಲಕೆ
ಸರಸಿಜಾನನೆ ಕುಂತಿಯೈರಾವತವನೇರಿದಳು (ಆದಿ ಪರ್ವ, ೨೧ ಸಂಧಿ, ೧೦೦ ಪದ್ಯ)
ತಾತ್ಪರ್ಯ:
ಕುಂತಿಯು ಐರಾವತಕ್ಕೆ ಪ್ರದಕ್ಷಿಣೆಯನ್ನು ಹಾಕಿ, ದಿಕ್ಪಾಲಕರಿಗೆ, ಮುನಿಗಳಿಗೆ ಸಂತೋಷದಿಂದ ನಮಸ್ಕರಿಸಿ, ರತ್ನಖಚಿತವಾದ ತೊಟ್ಟಿಲಿನಲ್ಲಿ ಕೂತಳು, ಅದನ್ನು ಆನೆಯ ಮೇಲಕ್ಕೆ ಎತ್ತಲು, ಕುಂತಿಯು ಐರಾವತದ ಮೇಲೆ ಆಸೀನಳಾದಳು.
ಅರ್ಥ:
ತಿರುಗು: ಸುತ್ತುವರಿ; ಬಲ: ದಕ್ಷಿಣ, ಪಾರ್ಶ್ವ; ಆನೆ: ಕರಿ, ಹಸ್ತಿ; ಕರ: ಕೈ; ನೊಸಲು: ಹಣೆ; ಚಾಚು: ವಿಸ್ತರಿಸು; ದಿಗು: ದಿಕ್ಕು, ದಿಶೆ, ಪಾಲಕ: ರಾಜ; ಮಣಿ: ನಮಸ್ಕರಿಸಿ; ಮುನಿ: ಋಷಿ; ಜನ: ಸಮೂಹ; ಕೈಮುಗಿ: ನಮಸ್ಕರಿಸು; ಹರುಷ: ಸಂತೋಷ; ವರ: ಶ್ರೇಷ್ಠ; ರತುನ: ಚಿನ್ನ; ತೊಟ್ಟಿಲು: ಲೋಹ ಅಥವ ಮರದಿಂದ ಕೂರಲು/ಮಲಗಲು ಮಾಡಿದ ಸಾಧನ;ಕುಳ್ಳಿರಲು: ಆಸೀನರಾಗುವುದು; ಮೇಲೆ: ಅಗ್ರ, ತುದಿ; ಸರಸಿಜ: ಕಮಲ; ಸರಸಿಜಾನನೆ: ಕಮಲದ ಮುಖದವಳು, ಸುಂದರಿ;
ಪದವಿಂಗಡಣೆ:
ತಿರುಗಿದಳು +ಬಲದಿಂದಲ್+ಆನೆಗೆ
ಕರವ+ ನೊಸಲೊಳು +ಚಾಚಿ +ದಿಗುಪಾ
ಲರಿಗೆ +ಮಣಿದಳು +ಮುನಿಜನಕೆ+ ಕೈಮುಗಿದು+ ಹರುಷದಲಿ
ವರ+ರತುನಮಯ +ತೊಟ್ಟಿಲಲಿ+ ಕು
ಳ್ಳಿರಲು +ತೆಗೆದರು +ಗಜದ +ಮೇಲಕೆ
ಸರಸಿಜಾನನೆ +ಕುಂತಿ+ಯೈರಾವತವನ್+ಏರಿದಳು
ಅಚ್ಚರಿ:
(೧) ಪ್ರದಕ್ಷಿಣೆ ಹಾಕುವ ಬಗೆ – ತಿರುಗಿದಳು ಬಲದಿಂದ (ಎಡಕ್ಕೆ)
(೨) ನಮಸ್ಕಾರದ ಪರಿ – ಕರವ ನೊಸಲೊಳು ಚಾಚಿ
(೩) ಕೈಮುಗಿ, ಮಣಿ, ಕರವ ನೊಸಲೊಳು ಚಾಚಿ – ನಮಸ್ಕರಿಸಿದಳು ಎಂದು ಹೇಳುವ ಪರಿ
(೪) ಕುಂತಿಗೆ ಉಪಯೋಗಿಸಿದ ಗುಣವಿಶೇಷ – ಸರಸಿಜಾನನೆ