ಗಂಗೆ ಮೊದಲಾದಮಳತರ ತೀ
ರ್ಥಂಗಳಲಿ ತದ್ವಾರಣಾಖ್ಯಾ
ನಂಗಳಲಿ ತತ್ತದ್ವಿಶೇಷವಿಧಾನ ದಾನದಲಿ
ತುಂಗವಿಕ್ರಮನೀ ಸಮಸ್ತ ಜ
ನಂಗಳೊಡನೆ ಸುತೀರ್ಥಯಾತ್ರಾ
ಸಂಗತಿಯಲೇ ಬಳಸಿದನು ಭೂಮಿಪ್ರದಕ್ಷಿಣವ (ಗದಾ ಪರ್ವ, ೬ ಸಂಧಿ, ೧೧ ಪದ್ಯ)
ತಾತ್ಪರ್ಯ:
ಗಂಗೆಯೇ ಮೊದಲಾದ ನದಿಗಳು ಹರಿಯುವ ತಿರ್ಥಕ್ಷೇತ್ರಗಳಲ್ಲಿ ಆಯಾ ಕ್ಷೇತ್ರದ ವಿಧಿಗಳಂತೆ ನಡೆದು, ತನ್ನ ಜೊತೆಗೆ ಬಂದವರೊಡನೆ ತೀರ್ಥಯಾತ್ರೆ ಮಾಡುತ್ತಾ ಭೂಪ್ರದಕ್ಷಿಣೆ ಮಾಡಿದನು.
ಅರ್ಥ:
ಗಂಗೆ: ಸುರನಧಿ; ಮೊದಲಾದ: ಮುಂತಾದ; ಅಮಳ: ನಿರ್ಮಲ; ತೀರ್ಥ: ಪವಿತ್ರ ಕ್ಷೇತ್ರ; ವಾರಣ: ಆನೆ; ವಿಶೇಷ: ಅತಿಶಯತೆ, ವೈಶಿಷ್ಟ್ಯ; ವಿಧಾನ: ರೀತಿ; ತುಂಗ: ಶ್ರೇಷ್ಠ; ವಿಕ್ರಮ: ಶೂರ; ಸಮಸ್ತ: ಎಲ್ಲಾ; ಜನ: ಮನುಷ್ಯ; ಯಾತ್ರಾ: ಪ್ರಯಾಣ; ಸಂಗತಿ: ವಿಷಯ, ವಿವರ; ಬಳಸು: ಉಪಯೋಗಿಸು; ಭೂಮಿ: ಅವನಿ; ಪ್ರದಕ್ಷಿಣೆ: ಸುತ್ತುವರಿ;
ಪದವಿಂಗಡಣೆ:
ಗಂಗೆ +ಮೊದಲಾದ್+ಅಮಳತರ +ತೀ
ರ್ಥಂಗಳಲಿ +ತದ್+ವಾರಣಾಖ್ಯಾನ್
ಅಂಗಳಲಿ +ತತ್ತದ್+ವಿಶೇಷ+ವಿಧಾನ +ದಾನದಲಿ
ತುಂಗವಿಕ್ರಮನ್+ಈ+ ಸಮಸ್ತ+ ಜ
ನಂಗಳೊಡನೆ +ಸುತೀರ್ಥ+ಯಾತ್ರಾ
ಸಂಗತಿಯಲೇ+ ಬಳಸಿದನು +ಭೂಮಿ+ಪ್ರದಕ್ಷಿಣವ
ಅಚ್ಚರಿ:
(೧) ತೀರ್ಥಂಗಳಲಿ, ವಾರಣಾಖ್ಯಾನಂಗಳಲಿ, ದಾನದಲಿ – ಪದಗಳ ಬಳಕೆ