ಉಗುಳಿದವು ಕುಳುಗಿಡಿಗಳನು ಕೈ
ದುಗಳು ವಾರುವ ಪಟ್ಟದಾನೆಗ
ಳೊಗುಮಿಗೆಯ ಕಂಬನಿಗಳಭ್ರದಿ ಧೂಮಕೇತುಗಳು
ನೆಗಳಿದವು ಬಿರುಗಾಳಿ ಗಿರಿಗಳ
ಮಗುಚಿ ಮುರಿದವು ದೇವತಾಭವ
ನಗಳ ಶಿಖರವನಂತವದ್ಭುತವಾಯ್ತು ನಿಮಿಷದಲಿ (ಸಭಾ ಪರ್ವ, ೧೬ ಸಂಧಿ, ೪೧ ಪದ್ಯ)
ತಾತ್ಪರ್ಯ:
ಹಸ್ತಿನಾಪುರದಲ್ಲಿ ಉತ್ಪಾತಗಳು, ಅಪಶಕುನಗಳು ಕಾಣಿಸಿಕೊಂಡವು. ಆಯುಧಗಳ ಚೂಪಾದ ಅಲಗುಗಳು ಕಿಡಿಗಳನ್ನುಗುಳಿದವು. ಪಟ್ಟದಾನೆ ಕುದುರೆಗಳು ಕಂಬನಿಗೆರೆದವು. ಆಕಾಶದಲ್ಲಿ ಧೂಮಕೇತುಗಳು ಕಾಣಿಸಿಕೊಂಡವು. ಬಿರುಗಾಳಿಯು ಬೆಟ್ಟಗಳನ್ನು ತಿರುವಿಹಾಕುವಂತೆ ಬೀಸಲು, ಅನೇಕ ದೇವಸ್ಥಾನಗಳ ಗೋಪುರಗಳು ಮುರಿದು ಬಿದ್ದವು.
ಅರ್ಥ:
ಉಗುಳು: ಹೊರಹಾಕು; ಕುಳುಗಿಡಿ: ತೀಕ್ಷ್ಣವಾದ ಕಿಡಿ; ಕೈದು: ಆಯುಧ, ಶಸ್ತ್ರ; ವಾರುವ: ಕುದುರೆ, ಅಶ್ವ; ಪಟ್ಟ: ಹಣೆಗಟ್ಟು; ಆನೆ: ಗಜ, ಕರಿ; ಒಗು: ಚೆಲ್ಲು, ಸುರಿ; ಕಂಬನಿ: ಕಣ್ಣಿರು; ಅಭ್ರ: ಆಗಸ; ಧೂಮಕೇತು: ಉಲ್ಕೆ, ಅಗ್ನಿ; ನೆಗಳು: ಕೈಗೊಳ್ಳು; ಬಿರುಗಾಳಿ: ರಭಸವಾದ ವಾಯು; ಗಿರಿ: ಬೆಟ್ಟ; ಮಗುಚಿ: ಉರುಳು; ಮುರಿ: ಸೀಳು; ದೇವತಾಭವನ: ದೇವಸ್ಥಾನ, ಗುಡಿ; ಶಿಖರ: ಗೋಪುರ; ಅದ್ಭುತ: ವಿಚಿತ್ರ, ವಿಸ್ಮಯ; ನಿಮಿಷ: ಕ್ಷಣ;
ಪದವಿಂಗಡಣೆ:
ಉಗುಳಿದವು +ಕುಳುಗಿಡಿಗಳನು+ ಕೈ
ದುಗಳು+ ವಾರುವ+ ಪಟ್ಟದಾನೆಗ
ಳೊಗುಮಿಗೆಯ ಕಂಬನಿಗಳ್+ಅಭ್ರದಿ +ಧೂಮಕೇತುಗಳು
ನೆಗಳಿದವು +ಬಿರುಗಾಳಿ+ ಗಿರಿಗಳ
ಮಗುಚಿ+ ಮುರಿದವು +ದೇವತಾಭವ
ನಗಳ +ಶಿಖರವ್+ಅನಂತವ್+ಅದ್ಭುತವಾಯ್ತು +ನಿಮಿಷದಲಿ
ಅಚ್ಚರಿ:
(೧) ಅಪಶಕುನಗಳು – ವಾರುವ ಪಟ್ಟದಾನೆಗಳೊಗುಮಿಗೆಯ ಕಂಬನಿಗಳ; ಅಭ್ರದಿ ಧೂಮಕೇತುಗಳು; ನೆಗಳಿದವು ಬಿರುಗಾಳಿ; ಗಿರಿಗಳ ಮಗುಚಿ ಮುರಿದವು; ದೇವತಾಭವ
ನಗಳ ಶಿಖರವನಂತವದ್ಭುತವಾಯ್ತು