ವಲಲ ಕಂಕ ಬೃಹನ್ನಳೆಯ ಮೈ
ಸುಳಿವ ಹೋಲುವರೆಂದು ಕೆಲಬರು
ಕೆಲರಿದೆತ್ತಣ ನರರು ತೆಗೆ ಸುರಲೋಕಪಾಲಕರು
ತಿಳಿಯಲರಿದೆಮಗೆಂದು ಕೆಲಬರು
ತಳವೆಳಗುಗೊಳುತಿರಲು ಮಂದಿಯ
ಕೆಲಕೆ ನೂಕಿಯೆ ತಂದೆಗುತ್ತರ ನಗುತ ಕೈ ಮುಗಿದ (ವಿರಾಟ ಪರ್ವ, ೧೧ ಸಂಧಿ, ೧೨ ಪದ್ಯ)
ತಾತ್ಪರ್ಯ:
ಪಾಂಡವರ ಕ್ಷಾತ್ರತೇಜಸ್ಸನ್ನು ನೋಡಿದ ಪರಿವಾರದವರಲ್ಲಿ ಕೆಲವರು, ಇವರು ಕಂಕ, ವಲಲ, ಬೃಹನ್ನಳೆಯನ್ನು ಹೋಲುವರಲ್ಲಾ, ಎಂದು ಮಾತಾಡಿಕೊಂಡರು, ಇವರು ಮನುಷ್ಯರಲ್ಲ, ದೇವತೆಗಳು ಎಂದು ಕೆಲವರು ಹೇಳಲು, ಮಿಕ್ಕ ಜನರು ನಮಗೇನು ತಿಳಿಯುವುದಿಲ್ಲ ಎಂದು ಇನ್ನೂ ಕೆಲವರು ಮಾತಾಡಿಕೊಂಡರು, ಆಗ ಉತ್ತರನು ಜನಗಳನ್ನು ಅತ್ತಿತ್ತ ನೂಕಿ, ತಂದೆಗೆ ಕೈಮುಗಿದು ನಗುತ್ತಾ ಹೇಳಿದನು.
ಅರ್ಥ:
ಮೈ: ತನು; ಹೋಲು: ಸದೃಶವಾಗು; ನರ: ಮನುಷ್ಯ; ತೆಗೆ: ಈಚೆಗೆ ತರು; ಸುರಲೋಕ: ದೇವಲೋಕ; ಪಾಲಕ: ಒಡೆಯ; ತಿಳಿ: ಅರಿ; ಮಂದಿ: ಜನರು; ನೂಕು: ತಳ್ಳು; ನಗು: ಸಂತಸ; ಕೈಮುಗಿ: ನಮಸ್ಕರಿಸು;
ಪದವಿಂಗಡಣೆ:
ವಲಲ +ಕಂಕ +ಬೃಹನ್ನಳೆಯ +ಮೈ
ಸುಳಿವ +ಹೋಲುವರೆಂದು +ಕೆಲಬರು
ಕೆಲರ್+ಇದೆತ್ತಣ +ನರರು +ತೆಗೆ +ಸುರಲೋಕ+ಪಾಲಕರು
ತಿಳಿಯಲ್+ಅರಿದ್+ಎಮಗೆಂದು +ಕೆಲಬರು
ತಳವೆಳಗುಗೊಳುತಿರಲು +ಮಂದಿಯ
ಕೆಲಕೆ+ ನೂಕಿಯೆ +ತಂದೆಗ್+ಉತ್ತರ +ನಗುತ +ಕೈ +ಮುಗಿದ
ಕುಮಾರವ್ಯಾಸಭಾರತ 