ಬರಿಯ ಬೊಬ್ಬಾಟವೊ ಶರಾವಳಿ
ಯಿರಿಗೆಲಸವೇನುಂಟೊ ಧರಣಿಯ
ಲೆರಕ ನಿಮ್ಮೈವರಿಗೆ ಗಡ ದ್ರೌಪದಿಗೆ ಸಮವಾಗಿ
ಹೊರಗು ಗಡ ಕುರುರಾಯನೀಗಳೊ
ಮರುದಿವಸವೋ ಸಿರಿಮುಡಿಗೆ ನೀ
ರೆರೆವ ಪಟ್ಟವದೆಂದು ನಿಮಗೆನುತೆಚ್ಚನಾ ಶಲ್ಯ (ಶಲ್ಯ ಪರ್ವ, ೨ ಸಂಧಿ, ೫೬ ಪದ್ಯ)
ತಾತ್ಪರ್ಯ:
ಬರೀ ಅಬ್ಬರಿಸುವೆಯೋ? ಬಾಣಗಳಿಂದ ಹೊಡೆಯುವುದು ಹೇಗೆಂಬ ಅರಿವಿದೆಯೋ? ನಿಮ್ಮೈವರಿಗೂ ದ್ರೌಪದಿಯು ಪತ್ನಿ, ಹಾಗೆಯೇ ಭೂಮಿಯು ಸಹ. ಕೌರವನಾದರೋ ಹೊರಗಿನವನು, ಅವನನ್ನು ಬಿಟ್ಟು, ಈ ಭೂಮಿಯ ಚಕ್ರಾಧಿಪತ್ಯದ ಅಭಿಷೇಕ ನೆನಗೆ ಎಂದಾಗುತ್ತದೆ ಎಂದು ಹೇಳುತ್ತ ಬಾಣಗಳನ್ನು ಬಿಟ್ಟನು.
ಅರ್ಥ:
ಬರಿ: ಕೇವಲ; ಬೊಬ್ಬಾಟ: ಆರ್ಭಟ, ಅಬ್ಬರ; ಶರಾವಳಿ: ಬಾಣಗಳ ಸಾಲು; ಕೆಲಸ: ಕಾರ್ಯ; ಧರಣಿ: ಭೂಮಿ; ಎರಕ: ಪ್ರೀತಿ, ಅನುರಾಗ; ಗಡ: ಅಲ್ಲವೆ; ಸಮ: ಸರಿಯಾದ; ಹೊರಗು: ಆಚೆಯವ; ರಾಯ: ರಾಜ; ಮುಡಿ: ತಲೆ; ಸಿರಿ: ಐಶ್ವರ್ಯ; ನೀರು: ಜಲ; ಎರೆವ: ಹಾಕುವ, ಸಲುಹು; ಪಟ್ಟ: ಅಧಿಕಾರ; ಎಚ್ಚು: ಬಾಣ ಪ್ರಯೋಗ ಮಾಡು;
ಪದವಿಂಗಡಣೆ:
ಬರಿಯ +ಬೊಬ್ಬಾಟವೊ +ಶರಾವಳಿ
ಯಿರಿ+ಕೆಲಸವೇನುಂಟೊ +ಧರಣಿಯಲ್
ಎರಕ +ನಿಮ್ಮೈವರಿಗೆ+ ಗಡ+ ದ್ರೌಪದಿಗೆ +ಸಮವಾಗಿ
ಹೊರಗು+ ಗಡ+ ಕುರುರಾಯನ್+ಈಗಳೊ
ಮರುದಿವಸವೋ +ಸಿರಿಮುಡಿಗೆ+ ನೀ
ರೆರೆವ+ ಪಟ್ಟವದೆಂದು +ನಿಮಗೆನುತ್+ಎಚ್ಚನಾ +ಶಲ್ಯ
ಅಚ್ಚರಿ:
(೧) ರಾಜ್ಯಾಭಿಷೇಕ ಎಂದು ಹೇಳುವ ಪರಿ – ಸಿರಿಮುಡಿಗೆ ನೀರೆರೆವ ಪಟ್ಟ
(೨) ಧರ್ಮಜನನ್ನು ಹಂಗಿಸುವ ಪರಿ – ಬರಿಯ ಬೊಬ್ಬಾಟವೊ ಶರಾವಳಿಯಿರಿಗೆಲಸವೇನುಂಟೊ
ಕುಮಾರವ್ಯಾಸಭಾರತ 