ಆವ ಹೆಂಗುಸನಳಲಿಸಿದೆ ಮು
ನ್ನಾವ ನೋಂಪಿಯನಳಿದೆನೋ ಮೇ
ಣಾವ ಪಾಪದ ಫಲಕೆ ಹಿಡಿದೆನೊ ಸಂಚಕಾರವನು
ಆವ ಹೆಂಗುಸು ನವೆದಳೆನ್ನವೊ
ಲಾವಳಳಲುತೆ ಮರುಗಿದಳು ಮ
ತ್ತಾವಳೆನ್ನಂದದ ಮಗಳ ಪಡೆದವಳು ಲೋಕದಲಿ (ವಿರಾಟ ಪರ್ವ, ೩ ಸಂಧಿ, ೫೬ ಪದ್ಯ)
ತಾತ್ಪರ್ಯ:
ಅದಾವ ಹೆಂಗಸನ್ನು ನಾನು ಹಿಂದೆ ನೋಯಿಸಿದ್ದೇನೋ? ಯಾವ ವ್ರತವನ್ನು ಭಂಗಿಸಿದ್ದೇನೋ? ಯಾವ ಪಾಪವನ್ನು ನನಗಿರಲಿ ಎಂದು ಸ್ವೀಕರಿಸಿದ್ದೇನೋ? ನನ್ನಮ್ತೆ ದುಃಖಿಸಿದ ಹೆಂಗಸಾದರು ಯಾರು? ನನ್ನಮ್ತೆ ಅತ್ತವಳು, ಮರುಗಿದವಳು ಯಾರು? ನನ್ನಂತಹ ಮಗಳನ್ನು ಪಡೆದವರು ಈ ಲೋಕದಲ್ಲಿ ಯಾರಿದ್ದಾರೆ ಎಂದು ತನ್ನ ನೋವನ್ನು ನುಂಗುತ್ತಾ ದುಃಖಿಸಿದಳು.
ಅರ್ಥ:
ಹೆಂಗುಸು: ಹೆಣ್ಣು, ಸ್ತ್ರೀ; ಅಳಲಿಸು: ನೋಯಿಸು; ಮುನ್ನ: ಮುಂಚೆ, ಹಿಂದೆ; ನೋಂಪು: ವ್ರತ; ಅಳಿ: ನಾಶ; ಮೇಣ್: ಅಥವ; ಪಾಪ: ಕೆಟ್ಟ ಕೆಲಸ; ಫಲ: ಫಲಿತಾಂಶ; ಹಿಡಿ: ಮುಟ್ಟಿಗೆ, ಬಂಧನ; ಸಂಚಕಾರ: ಮುಂಗಡ; ನವೆ: ದುಃಖಿಸು, ಕೊರಗು; ಮರುಗು: ದುಃಖಿಸು; ಮಗಳು: ಸುತೆ; ಪಡೆ: ದೊರಕು; ಲೋಕ: ಜಗತ್ತು;
ಪದವಿಂಗಡಣೆ:
ಆವ +ಹೆಂಗುಸನ್+ಅಳಲಿಸಿದೆ +ಮುನ್ನ್
ಆವ +ನೋಂಪಿಯನ್+ಅಳಿದೆನೋ +ಮೇಣ್
ಆವ +ಪಾಪದ +ಫಲಕೆ+ ಹಿಡಿದೆನೊ +ಸಂಚಕಾರವನು
ಆವ +ಹೆಂಗುಸು +ನವೆದಳ್+ಎನ್ನವೊಲ್
ಆವಳ್+ಅಳಲುತೆ+ ಮರುಗಿದಳು +ಮತ್ತ್
ಆವಳ್+ಎನ್ನಂದದ +ಮಗಳ+ ಪಡೆದವಳು+ ಲೋಕದಲಿ
ಅಚ್ಚರಿ:
(೧) ಎಲ್ಲಾ ಸಾಲಿನ ಮೊದಲ ಪದ – ಆವ