ನಗೆಗೆ ನಗೆ ಕುಂಟಣಿ ವಿವೇಕದ
ಹೊಗೆಗೆ ಹೊಗೆ ಸಖಿಯಾದುದಲ್ಲಿಯ
ಹಗರಣಿಗೆ ನಾನಾದೆನದು ನೋಟಕದ ಜನವಾಯ್ತು
ನಗುವವರ ಜರೆದನೆ ಯುಧಿಷ್ಠಿರ
ನಗೆಯ ಮರೆದೆನೆ ಬೊಪ್ಪ ನಿಮ್ಮಯ
ಮಗನವಸ್ಥಾರೂಪವಿದು ಚಿತ್ತವಿಸಿ ನೀವೆಂದ (ಸಭಾ ಪರ್ವ, ೧೩ ಸಂಧಿ, ೪೨ ಪದ್ಯ)
ತಾತ್ಪರ್ಯ:
ಆಲಯದಲ್ಲಿದ್ದ ದಾಸಿಯರ ನಗೆ ಹಿಂದೆ ಕೇಳಿದುದು ಈಗ ಮತ್ತೆ ಆ ನಗೆಯೇ ಕೇಳಿತು, ಆಗ ನಾನು ವಿವೇಕರಹಿತನಾಗಿದ್ದೆನಲ್ಲ, ಈಗ ಮತ್ತೆ ಅವಿವೇಕಿಯಾದೆ, ನಾನು ಅವರೆದುರು ಹಾಸ್ಯಪಾತ್ರಧಾರಿಯಾದೆ, ಅಲ್ಲಿದ್ದವರೆಲ್ಲರೂ ಪ್ರೇಕ್ಷಕರಾದರು. ನನ್ನನ್ನು ನೋಡಿ ನಗುವವರನ್ನು ಯುಧಿಷ್ಠಿರನು ತಡೆಯಲಿಲ್ಲ. ಆ ನಗುವನ್ನು ನಾನು ಮರೆತೆನೇ? ಅಪ್ಪ ನಿನ್ನ ಮಗನ ದುರವಸ್ಥೆಯ ರೂಪವನ್ನು ಮನಸ್ಸಿಟ್ಟು ಕೇಳು ಎಂದು ತನ್ನ ನೋವನ್ನು ದುರ್ಯೋಧನನು ತೋಡಿಕೊಂಡನು.
ಅರ್ಥ:
ನಗೆ: ನಕ್ಕು, ಹರ್ಷ; ಕುಂಟಣಿ: ತಲೆಹಿಡುಕಿ; ವಿವೇಕ: ಯುಕ್ತಾಯುಕ್ತ ವಿಚಾರ, ವಿವೇಚನೆ; ಹೊಗೆ: ಧೂಮ; ಸಖಿ: ಸ್ನೇಹಿತೆ; ಹಗರಣಿಗ: ವಿವಿಧ ವೇಷ, ಅಭಿನಯಗಳಿಂದ ಜನರನ್ನು ನಗಿಸುವವನು, ವೇಷಧಾರಿ; ನೋಟಕ: ನೋಡುವವರ, ಪ್ರೇಕ್ಷಕ; ಜನ: ಮನುಷ್ಯರ ಗುಂಪು; ಜರೆ: ಬಯ್ಯು; ಮರೆ: ಜ್ಞಾಪಕದಿಂದ ದೂರವಿಡು; ಬೊಪ್ಪ: ತಂದೆ; ಮಗ: ಪುತ್ರ; ಅವಸ್ಥ: ಸ್ಥಿತಿ; ಚಿತ್ತವಿಸು: ಗಮನವಿಟ್ಟು ಕೇಳು;
ಪದವಿಂಗಡಣೆ:
ನಗೆಗೆ +ನಗೆ +ಕುಂಟಣಿ +ವಿವೇಕದ
ಹೊಗೆಗೆ +ಹೊಗೆ +ಸಖಿಯಾದುದ್+ಅಲ್ಲಿಯ
ಹಗರಣಿಗೆ+ ನಾನಾದೆನ್+ಅದು +ನೋಟಕದ+ ಜನವಾಯ್ತು
ನಗುವವರ +ಜರೆದನೆ+ ಯುಧಿಷ್ಠಿರ
ನಗೆಯ+ ಮರೆದೆನೆ+ ಬೊಪ್ಪ +ನಿಮ್ಮಯ
ಮಗನ್+ಅವಸ್ಥಾ+ರೂಪವಿದು+ ಚಿತ್ತವಿಸಿ+ ನೀವೆಂದ
ಅಚ್ಚರಿ:
(೧) ನಗೆಗೆ ನಗೆ; ಹೊಗೆಗೆ ಹೊಗೆ – ಜೋಡಿ ಪದಗಳು
(೨) ದುರ್ಯೋಧನನ ಸ್ಥಿತಿ – ಹಗರಣಿಗೆ ನಾನಾದೆನದು
(೩) ನಗೆ, ಹೊಗೆ; ಜರೆದನೆ, ಮರೆದೆನೆ – ಪ್ರಾಸ ಪದ