ಏನ ಹೇಳುವೆ ಭಟನ ಶರ ಸಂ
ಧಾನವನು ಪುಂಖಾನುಪುಂಖವಿ
ಧಾನವನು ಝೇಂಕಾರಶರಜಾಳಪ್ರಸಾರಣವ
ಆ ನಿರಂತರ ಸರಳ ಸಾರದ
ಸೋನೆ ಸದೆದುದು ಧರ್ಮಸುತನ ರ
ಣಾನುರಾಗವ ತೊಳೆದುದದ್ಭುತವಾಯ್ತು ನಿಮಿಷದಲಿ (ಶಲ್ಯ ಪರ್ವ, ೩ ಸಂಧಿ, ೪೩ ಪದ್ಯ)
ತಾತ್ಪರ್ಯ:
ಶಲ್ಯನ ಬಾಣ ಸಂಧಾನವನ್ನು ಏನೆಂದು ಹೊಗಳಲಿ, ಅವನ ಬಾಣಗಳು ಒಂದರ ಹಿಂದೊಂದು ಸದ್ದುಮಾಡುತ್ತಾ ಧರ್ಮಜನನ್ನು ನಿರಂತರವಾಗಿ ಘಾತಿಸಲು, ಯುದ್ಧಮಾಡುವ ಆಸಕ್ತಿಯೇ ಅವನಿಗಿಲ್ಲವಾಯಿತು.
ಅರ್ಥ:
ಹೇಳು: ತಿಳಿಸು; ಭಟ: ಸೈನಿಕ; ಶರ: ಬಾಣ; ಸಂಧಾನ: ಸೇರಿಸುವುದು, ಹೊಂದಿಸುವುದು; ಪುಂಖಾನುಪುಂಖ: ಒಂದು ಬಾಣದ ಹಿಳುಕನ್ನನುಸರಿಸಿ ಮತ್ತೊಂದು; ವಿಧಾನ: ರೀತಿ; ಝೇಂಕಾರ: ದುಂಬಿಗಳ ಮೊರೆತ, ಧ್ವನಿ; ಶರಜಾಳ: ಬಾಣದ ಗುಂಪು; ಪ್ರಸಾರಣ: ಪ್ರಸಾರ, ಹರಡುವಿಕೆ; ನಿರಂತರ: ಯಾವಾಗಲು; ಸರಳ: ಬಾಣ; ಸಾರ: ಸತ್ವ; ಸೋನೆ: ಮಳೆ; ಸದೆ: ಹೊಡಿ; ಸುತ: ಮಗ; ರಣ: ಯುದ್ಧ; ಅನುರಾಗ: ಪ್ರೀತಿ; ತೊಳೆ: ಸ್ವಚ್ಛಮಾಡು; ಅದ್ಭುತ: ಆಶ್ಚರ್ಯ; ನಿಮಿಷ: ಕ್ಷಣ;
ಪದವಿಂಗಡಣೆ:
ಏನ+ ಹೇಳುವೆ +ಭಟನ +ಶರ +ಸಂ
ಧಾನವನು +ಪುಂಖಾನುಪುಂಖ +ವಿ
ಧಾನವನು +ಝೇಂಕಾರ+ಶರಜಾಳ+ಪ್ರಸಾರಣವ
ಆ +ನಿರಂತರ+ ಸರಳ+ ಸಾರದ
ಸೋನೆ +ಸದೆದುದು +ಧರ್ಮಸುತನ +ರಣ
ಅನುರಾಗವ+ ತೊಳೆದುದ್+ಅದ್ಭುತವಾಯ್ತು +ನಿಮಿಷದಲಿ
ಅಚ್ಚರಿ:
(೧) ಸ ಕಾರದ ಸಾಲು ಪದ – ಸರಳ ಸಾರದ ಸೋನೆ ಸದೆದುದು
(೨) ಶರ, ಸರಳ – ಸಮಾನಾರ್ಥಕ ಪದ
(೩) ಯುದ್ಧದ ಆಸಕ್ತಿ ಕಳೆಯಿತು ಎಂದು ಹೇಳಲು – ಧರ್ಮಸುತನ ರಣಾನುರಾಗವ ತೊಳೆದುದ್
(೪) ಶರಸಂಧಾನ, ಶರಜಾಳ, ಸರಳ ಸಾರದ ಸೋನೆ – ಬಾಣಗಳನ್ನು ವಿವರಿಸುವ ಪದಗಳು