ಕರ್ಣ ಕರ್ಣಕಠೋರ ಸಾಹಸ
ನಿರ್ಣಯಿಸು ಪರಸೈನ್ಯ ಸುಭಟಮ
ಹಾರ್ಣವಕೆ ಬಿಡು ನಿನ್ನ ವಿಕ್ರಮ ಬಾಡಬಾನಳನ
ಪೂರ್ಣಕಾಮನು ನೀನು ಕುರುಬಲ
ಕರ್ಣಧಾರನು ನೀನು ವಿಶ್ವ ವಿ
ಕರ್ಣ ನೀನೇ ರಕ್ಷಿಸೆಂದುದು ನಿಖಿಳ ಪರಿವಾರ (ದ್ರೋಣ ಪರ್ವ, ೧ ಸಂಧಿ, ೧೭ ಪದ್ಯ)
ತಾತ್ಪರ್ಯ:
ಪರಿವಾರದವರು ಕಠೋರ ಸಾಹಸಿಯಾದ ಕರ್ಣ, ಯುದ್ಧವನ್ನು ಕೌರವನ ಪರವಾಗಿ ನಿರ್ಣಯಿಸು, ನಿನ್ನ ಪರಾಕ್ರಮ ವಡಬಾನಲದಿಂದ ಪಾಂಡವ ಸೈನ್ಯಸಾಗರವನ್ನು ಶೋಷಿಸು, ಕುರುಕುಲಕ್ಕೆ ನೀನು ನಾವಿಕ. ಬಯಸಿದುದನ್ನು ಸಾಧಿಸುವ ಶಕ್ತಿಯುಳ್ಳವನು, ವಿಶ್ವವನ್ನೇ ಗೆಲ್ಲಬಲ್ಲ ಬಾಣಗಲನ್ನು ಪಡೆದವನು, ನೀನೇ ನಮ್ಮನ್ನು ರಕ್ಷಿಸು ಎಂದು ಪರಿವಾರದವರು ಕೂಗಿದರು.
ಅರ್ಥ:
ಕರ್ಣ: ಕಿವಿ; ಕಠೋರ: ಬಿರುಸು, ಉಗ್ರ; ಸಾಹಸ: ಪರಾಕ್ರಮ; ನಿರ್ಣಯ: ನಿರ್ಧಾರ; ಪರಸೈನ್ಯ: ಶತ್ರು ಸೈನ್ಯ; ಸುಭಟ: ಶೂರ; ಮಹಾರ್ಣವ: ದೊಡ್ಡ ಯುದ್ಧ; ಬಿಡು: ತ್ಯಜಿಸು; ವಿಕ್ರಮ: ಶಕ್ತಿ, ಪರಾಕ್ರಮ; ಬಾಡಬಾನಳ: ವಡಬಾನಳ: ವಡಬ, ಸಮುದ್ರದಲ್ಲಿರುವ ಬೆಂಕಿ, ಬಡ ಬಾಗ್ನಿ; ಪೂರ್ಣಕಾಮ: ಬಯಸಿದುದನ್ನು ಸಾಧಿಸುವ ಶಕ್ತಿಯುಳ್ಳವ; ಕರ್ಣಧಾರ: ನಾವಿಕ; ವಿಶ್ವ: ಜಗತ್ತು; ವಿಕರ್ಣ: ಒಂದು ಬಗೆಯ ಬಾಣ; ರಕ್ಷಿಸು: ಕಾಪಾಡು; ನಿಖಿಳ: ಎಲ್ಲಾ; ಪರಿವಾರ: ಬಂಧು ಬಳಗ;
ಪದವಿಂಗಡಣೆ:
ಕರ್ಣ +ಕರ್ಣಕಠೋರ +ಸಾಹಸ
ನಿರ್ಣಯಿಸು +ಪರಸೈನ್ಯ+ ಸುಭಟ+ಮ
ಹಾರ್ಣವಕೆ +ಬಿಡು +ನಿನ್ನ +ವಿಕ್ರಮ +ಬಾಡಬಾನಳನ
ಪೂರ್ಣಕಾಮನು+ ನೀನು +ಕುರುಬಲ
ಕರ್ಣಧಾರನು+ ನೀನು +ವಿಶ್ವ +ವಿ
ಕರ್ಣ +ನೀನೇ +ರಕ್ಷಿಸೆಂದುದು +ನಿಖಿಳ +ಪರಿವಾರ
ಅಚ್ಚರಿ:
(೧) ಕರ್ಣನನ್ನು ಹೊಗಳಿದ ಪರಿ – ಪೂರ್ಣಕಾಮನು ನೀನು ಕುರುಬಲ ಕರ್ಣಧಾರನು ನೀನು ವಿಶ್ವ ವಿ
ಕರ್ಣ ನೀನೇ
(೨) ಕರ್ಣ, ಕರ್ಣಕಠೋರ, ವಿಕರ್ಣ, ಕರ್ಣಧಾರ – ಕರ್ಣ ಪದದ ಬಳಕೆ