ಆಹಹ ಪಾತಿವ್ರತ್ಯವತಿಸ
ನ್ನಿಹಿತವಲ್ಲಾ ನಿನಗೆ ಹಲಬರ
ಮಹಿಳೆ ಸತಿಯೆನಿಸುವೊಡೆ ಸೂಳೆಯರೇಕ ಪುರುಷರಲಿ
ವಿಹರಿಸುವರೇ ಲೋಕಧರ್ಮದ
ರಹಣಿ ರಹಿಸುವುದೈಸಲೇ ನಮ
ಗಿಹುದು ಮತವಲ್ಲದಿರೆ ಮಾಣಲೆನುತ್ತ ಮುರಿದೆದ್ದ (ಅರಣ್ಯ ಪರ್ವ, ೨೪ ಸಂಧಿ, ೧೮ ಪದ್ಯ)
ತಾತ್ಪರ್ಯ:
ಅಹಾ ನಿನಗೆ ಪಾತಿವ್ರತ್ಯವು ಬಹಳ ಹತ್ತಿರವೆಂದು ಕಾಣಿಸುತ್ತದೆ. ಹಲವರ ಹೆಂಡತಿ ಪತಿವ್ರತೆಯೆಂದೊಪ್ಪಿದರೆ ವೇಶ್ಯೆಯರು ಏಕ ಪುರುಷನೊಡನೆ ವಿಹರಿಸುವಳೇ? ಲೋಕದ ಮಾರ್ಗವೇ ಸರಿಯೆಂದು ನನ್ನ ಅಭಿಪ್ರಾಯ, ಹಾಗಲ್ಲದಿದ್ದರೆ ಇರಲಿ ಬಿಡು ಎನ್ನುತ್ತಾ ಮೇಲೆದ್ದನು.
ಅರ್ಥ:
ಪಾತಿವ್ರತ್ಯ: ಗರತಿ, ಗಂಡನಿಗೆ ವಿಧೇಯಳಾದವಳು; ಅತಿ: ತುಂಬ; ಸನ್ನಿಹಿತ: ಹತ್ತಿರ; ಹಲಬರು: ಬಹಳ; ಮಹಿಳೆ: ಹೆಣ್ಣು; ಸತಿ: ಹೆಂಡತಿ; ಸೂಳೆ: ವೇಶ್ಯೆ; ಪುರುಷ: ಗಂಡು; ವಿಹರಿಸು: ಓಡಾಡು; ಲೋಕ: ಜಗತ್ತು; ಧರ್ಮ: ಧಾರಣೆ ಮಾಡಿದುದು; ರಹಣಿ: ಹೊಂದಿಕೆ; ರಹಿ: ರೀತಿ, ವೈಭವ; ಐಸಲೇ: ಅಲ್ಲವೇ; ಮತ: ವಿಚಾರ; ಮಾಣ್: ಅಥವ; ಮುರಿ: ಸೀಳು;
ಪದವಿಂಗಡಣೆ:
ಆಹಹ+ ಪಾತಿವ್ರತ್ಯವ್+ಅತಿ+ಸ
ನ್ನಿಹಿತವಲ್ಲಾ+ ನಿನಗೆ +ಹಲಬರ
ಮಹಿಳೆ +ಸತಿ+ಎನಿಸುವೊಡೆ+ ಸೂಳೆಯರ್+ಏಕ+ ಪುರುಷರಲಿ
ವಿಹರಿಸುವರೇ+ ಲೋಕಧರ್ಮದ
ರಹಣಿ +ರಹಿಸುವುದ್+ ಐಸಲೇ +ನಮ
ಗಿಹುದು +ಮತವ್+ಅಲ್ಲದಿರೆ +ಮಾಣಲ್+ಎನುತ್ತ +ಮುರಿದೆದ್ದ
ಅಚ್ಚರಿ:
(೧) ದ್ರೌಪದಿಯನ್ನು ಹಂಗಿಸುವ ಪರಿ – ಹಲಬರ ಮಹಿಳೆ ಸತಿಯೆನಿಸುವೊಡೆ ಸೂಳೆಯರೇಕ ಪುರುಷರಲಿ ವಿಹರಿಸುವರೇ