ನಂಬಿಸಿದುದೊಂದೆಡೆಯ ಬಾಗಿಲು
ಬಿಂಬಿಸಿತು ಭಿತ್ತಿಯಲಿ ತತ್ಪ್ರತಿ
ಬಿಂಬವೆಂದಾನರಿಯದೊಡಹಾಯಿದೆನು ಚೌಕಿಗೆಯ
ಎಂಬೆನೇನನು ಹೊರಳಿ ನಗುವ ನಿ
ತಂಬಿನಿಯರನು ಭೀಮ ಪಾರ್ಥರ
ಡಂಬರವ ಕಂಡಸುವ ಹಿಡಿದೆನು ನೋಡಿಕೊಳ್ಳೆಂದ (ಸಭಾ ಪರ್ವ, ೧೩ ಸಂಧಿ, ೪೦ ಪದ್ಯ)
ತಾತ್ಪರ್ಯ:
ಒಂದು ಕಡೆ ಬಾಗಿಲು ಗೋಡೆಯೊಂದರ ಭಿತ್ತಿಯಲ್ಲಿ ಪ್ರತಿಬಿಂಬಿಸಿ ಬಾಗಿಲಿನಂತೆ ಕಾಣಿಸಿ ನನ್ನನ್ನು ನಂಬಿಸಿತು. ಅದು ಬಾಗಿಲೆಂದು ತಿಳಿದು ನಾನು ಹೋಗಲು ಯತ್ನಿಸಿದಾಗ ಅದು ಗೋಡೆಯಾಗಿತ್ತು ಅದಕ್ಕೆ ಡಿಕ್ಕಿ ಹೊಡೆದೆ. ಇದನ್ನು ನೋಡಿದ ಹೆಂಗಸರು ಹೊರಳಿ ಹೊರಳಿ ನಕ್ಕರು. ಭೀಮಾರ್ಜುನರು ಬಿಂಕದಿಂದಿದ್ದರು. ಅದನ್ನು ನೋಡಿಯೂ ನಾನು ಜೀವ ಹಿಡಿದುಕೊಂಡೆ, ನನ್ನ ದುರವಸ್ಥೆಯನ್ನು ನೀವೇ ನೋಡಿ ಎಂದು ತನ್ನ ಅಳಲನ್ನು ತೋಡಿಕೊಂಡನು.
ಅರ್ಥ:
ನಂಬಿಕೆ: ವಿಶ್ವಾಸ, ಶ್ರದ್ಧೆ; ಒಂದೆಡೆ: ಒಂದು ಬದಿ; ಬಾಗಿಲು: ಕದ; ಬಿಂಬಿಸು: ತೋರು; ಭಿತ್ತಿ: ಒಡೆಯುವುದು, ಸೀಳುವುದು; ಪ್ರತಿ: ಸಾಟಿ, ಸಮಾನ; ಬಿಂಬ: ಪ್ರತಿರೂಪ, ಪಡಿನೆಳಲು; ಹಾಯಿ: ಹಾರು, ಜಿಗಿ; ಅರಿ: ತಿಳಿ; ಚೌಕಿ:ಮನೆಯ ಒಳ ಅಂಗಳ, ಪೀಠ, ಮಣೆ; ಹೊರಳು: ತಿರುವು, ಬಾಗು, ಉರುಳು; ನಗು: ಸಂತೋಷ; ನಿತಂಬಿನಿ: ಯುವತಿ; ಡಂಬರ: ಆಡಂಬರ, ಜಂಬ; ಕಂಡು: ನೋಡು; ಅಸು: ಪ್ರಾಣ; ಹಿಡಿ: ಬಂಧಿಸು, ತಳೆ, ಗ್ರಹಿಸು; ನೋಡು: ವೀಕ್ಷಿಸು;
ಪದವಿಂಗಡಣೆ:
ನಂಬಿಸಿದುದ್+ಒಂದೆಡೆಯ +ಬಾಗಿಲು
ಬಿಂಬಿಸಿತು+ ಭಿತ್ತಿಯಲಿ +ತತ್ಪ್ರತಿ
ಬಿಂಬವೆಂದ್+ಆನ್+ಅರಿಯದ್+ಒಡಹಾಯಿದೆನು+ ಚೌಕಿಗೆಯ
ಎಂಬೆನ್+ಏನನು+ ಹೊರಳಿ+ ನಗುವ+ ನಿ
ತಂಬಿನಿಯರನು +ಭೀಮ +ಪಾರ್ಥರ
ಡಂಬರವ+ ಕಂಡ್+ಅಸುವ +ಹಿಡಿದೆನು +ನೋಡಿಕೊಳ್ಳೆಂದ
ಅಚ್ಚರಿ:
(೧) ನಂಬಿ, ಬಿಂಬಿ, ನಿತಂಬಿ – ಪ್ರಾಸ ಪದಗಳು
(೨) ಬ ಕಾರದ ತ್ರಿವಳಿ ಪದ – ಬಾಗಿಲು ಬಿಂಬಿಸಿತು ಭಿತ್ತಿಯಲಿ
ಕುಮಾರವ್ಯಾಸಭಾರತ 