ಮಾವ ಭೀಮಾರ್ಜುನರ ಭಾರಣೆ
ಗಾವ ನಿಲುವನು ಸಾಕದಂತಿರ
ಲೀ ವಿಚಿತ್ರ ಕಳಂಬ ಖಂಡನ ಪಂಡಿತತ್ವವನು
ನೀವು ತೋರಿರೆ ಸಾಕು ಸಾಮ
ರ್ಥ್ಯಾವಲಂಬವುಳ್ಳಡೀ ಶ
ಸ್ತ್ರಾವಳಿಯ ಸೈರಿಸಿಯೆನುತ ಯಮಸೂನು ತೆಗೆದೆಚ್ಚ (ಶಲ್ಯ ಪರ್ವ, ೩ ಸಂಧಿ, ೩೬ ಪದ್ಯ)
ತಾತ್ಪರ್ಯ:
ಧರ್ಮಜನು ನುಡಿಯುತ್ತಾ, ಮಾವ, ಭೀಮಾರ್ಜುನರ ಯುದ್ಧವನ್ನು ಎದುರಿಸಿ ನಿಲ್ಲಬಲ್ಲವರಾರು, ಆ ಸುದ್ದಿ ಬೇಡ, ನಿಮಗೆ ಸಾಮರ್ಥ್ಯವಿದ್ದುದೇ ಆದರೆ ನಾನು ಬಿಡುವ ಬಾಣಗಳನ್ನು ಕತ್ತರಿಸಿ, ನಿಮ್ಮ ಯುದ್ಧ ಪಾಂಡಿತ್ಯವನ್ನು ತೋರಿಸೆ. ಈ ಬಾಣಗಳನ್ನು ಸಹಿಸಿಕೊಳ್ಳಿರಿ ಎಂದು ಬಾಣಗಳನ್ನು ಬಿಟ್ಟನು.
ಅರ್ಥ:
ಮಾವ: ತಾಯಿಯ ಸಹೋದರ; ಭಾರಣೆ: ಮಹಿಮೆ, ಗೌರವ; ನಿಲು: ನಿಲ್ಲು, ತಡೆ; ಸಾಕು: ಬೇಡ; ವಿಚಿತ್ರ: ಆಶ್ಚರ್ಯಕರವಾದುದು; ಕಳಂಬ: ಬಾಣ, ಅಂಬು; ಖಂಡ: ತುಂಡು, ಚೂರು; ಪಂಡಿತ: ವಿದ್ವಾಂಸ; ತೋರು: ಗೋಚರ; ಸಾಮರ್ಥ್ಯ: ಶಕ್ತಿ; ಅವಲಂಬನ: ಆಸರೆ; ಶಸ್ತ್ರಾವಳಿ: ಆಯುಧಗಳ ಗುಂಪು; ಸೈರಿಸು: ತಾಳು, ಸಹಿಸು; ಸೂನು: ಮಗ; ಎಚ್ಚು: ಬಾಣ ಪ್ರಯೋಗ ಮಾಡು;
ಪದವಿಂಗಡಣೆ:
ಮಾವ+ ಭೀಮಾರ್ಜುನರ +ಭಾರಣೆಗ್
ಆವ +ನಿಲುವನು +ಸಾಕ್+ಅದಂತಿರಲ್
ಈ+ ವಿಚಿತ್ರ +ಕಳಂಬ +ಖಂಡನ +ಪಂಡಿತತ್ವವನು
ನೀವು +ತೋರಿರೆ +ಸಾಕು +ಸಾಮ
ರ್ಥ್ಯ+ಅವಲಂಬವುಳ್ಳಡ್+ಈ+ ಶ
ಸ್ತ್ರಾವಳಿಯ +ಸೈರಿಸಿ+ಎನುತ +ಯಮಸೂನು +ತೆಗೆದೆಚ್ಚ
ಅಚ್ಚರಿ:
(೧) ಭೀಮಾರ್ಜುನರನ್ನು ಹೊಗಳುವ ಪರಿ – ಭೀಮಾರ್ಜುನರ ಭಾರಣೆಗಾವ ನಿಲುವನು
(೨) ಶಲ್ಯನನ್ನು ಪ್ರಚೋದಿಸುವ ಪರಿ – ಲೀ ವಿಚಿತ್ರ ಕಳಂಬ ಖಂಡನ ಪಂಡಿತತ್ವವನು ನೀವು ತೋರಿರೆ ಸಾಕು
ಕುಮಾರವ್ಯಾಸಭಾರತ 