ಇವರನರಮನೆಯೊಳಗೆ ಕನ್ಯಾ
ಭವನ ಮಧ್ಯದೊಳಿರಿಸಿ ಬಳಿಕಿನೊ
ಳಿವರ ಶುಶ್ರೂಷೆಗೆ ಸುಭದ್ರಾದೇವಿಯನು ಕರೆಸಿ
ಇವರಪೂರ್ವ ಮಹಾತ್ಮಕರು ನೀ
ನಿವರ ದೇವಾರ್ಚನೆ ಸಮಾಧಿ
ಪ್ರವರದಲಿ ಬೆಸಸಿದನು ಮಾಡುವುದೆಂದು ನೇಮಿಸಿದ (ಆದಿ ಪರ್ವ, ೧೯ ಸಂಧಿ, ೩೨ ಪದ್ಯ)
ತಾತ್ಪರ್ಯ:
ಸನ್ಯಾಸಿ ವೇಷದಲ್ಲಿದ್ದ ಅರ್ಜುನನನ್ನು ಅರಮನೆಯ ಕನ್ಯಾಭವನದ ಮಧ್ಯಭಾಗದಲ್ಲಿರಿಸಿ, ತನ್ನ ತಂಗಿಯಾದ ಸುಭದ್ರೆಯನ್ನು ಇವರ ಶುಶ್ರೂಷೆಗೆ ನೇಮಿಸಿ, ಇವರು ಅಪೂರ್ವ ಮಹಾತ್ಮರು, ಇವರು ಮಾಡುವ ದೇವತಾರ್ಚನೆ ಇವರು ಸಮಾಧಿಸ್ಥಿತಿಯಲ್ಲಿರಲು ಅನುಕೂಲಗಳನ್ನು ಇವರು ಹೇಳಿದಂತೆ ಮಾಡು ಎಂದು ಆಜ್ಞಾಪಿಸಿದನು.
ಅರ್ಥ:
ಅರಮನೆ: ರಾಜರ ವಾಸಸ್ಥಾನ; ಕನ್ಯ: ಹುಡುಗಿ; ಭವನ: ಮನೆ; ಮಧ್ಯ: ನಡು; ಶುಶ್ರೂಷೆ: ಆರೈಕೆ; ಕರೆಸಿ: ಬರೆಮಾಡು; ಅಪೂರ್ವ: ಅಪರೂಪವಾದ; ಮಹಾತ್ಮ: ಘನವಂತ;ಅರ್ಚನೆ: ಪೂಜೆ; ಸಮಾಧಿ: ಒಂದು ಸ್ಥಿತಿ, ತನ್ಮಯತೆ; ಪ್ರವರ: ಶ್ರೇಷ್ಠ; ಬೆಸಸು:ಹೇಳು; ನೇಮಿಸು: ಮನಸ್ಸನ್ನು ನಿಯಂತ್ರಿಸು;
ಪದವಿಂಗಡಣೆ:
ಇವರನ್+ ಅರಮನೆಯೊಳಗೆ +ಕನ್ಯಾ
ಭವನ +ಮಧ್ಯದೊಳ್+ಇರಿಸಿ+ ಬಳಿಕಿನೊಳ್
ಇವರ +ಶುಶ್ರೂಷೆಗೆ +ಸುಭದ್ರಾದೇವಿಯನು +ಕರೆಸಿ
ಇವರ್+ ಅಪೂರ್ವ +ಮಹಾತ್ಮಕರು+ ನೀನ್
ಇವರ+ ದೇವಾರ್ಚನೆ+ ಸಮಾಧಿ
ಪ್ರವರದಲಿ+ ಬೆಸಸಿದನು +ಮಾಡುವುದೆಂದು +ನೇಮಿಸಿದ
ಅಚ್ಚರಿ:
(೧) ಇವರ – ೪ ಸಾಲುಗಳಲ್ಲಿ ಮೊದಲ ಪದ
(೨) ಇರಿಸಿ, ಕರೆಸಿ, ಬೆಸಸಿ, ನೇಮಿಸಿ – ಪ್ರಾಸ ಪದಗಳು
ಕುಮಾರವ್ಯಾಸಭಾರತ 