ಲಕ್ಕ ಊರ್ವಿಗೆ ರವಿಯ ರಥ ಶಶಿ
ಲಕ್ಕವೆರಡು ತ್ರಿಲಕ್ಕ ಯೋಜನ
ಮಿಕ್ಕಿಹವು ನಕ್ಷತ್ರ ಬುಧನಿಹನೈದುಲಕ್ಕದಲಿ
ಲಕ್ಕವೇಳಾ ಶುಕ್ರ ಕುಜನವ
ಲಕ್ಕ ಗುರು ಹನ್ನೊಂದು ಲಕ್ಕವು
ಮಿಕ್ಕ ವಸುಧಾತಳಕೆ ಶನಿ ಹದಿಮೂರುವರೆ ಲಕ್ಕ (ಅರಣ್ಯ ಪರ್ವ, ೮ ಸಂಧಿ, ೬೭ ಪದ್ಯ)
ತಾತ್ಪರ್ಯ:
ಭೂಮಿಯಿಂದ ಸೂರ್ಯನಿಗೆ ಲಕ್ಷ ಯೋಜನ, ಚಂದ್ರನಿಗೆ ಎರಡು ಲಕ್ಷ, ಮೂರು ಲಕ್ಷ ನಕ್ಷತ್ರಗಳ್, ಬುಧನಿಗೆ ಐದು ಲಕ್ಷ, ಶುಕ್ರನಿಗೆ ಏಳು ಲಕ್ಷ, ಕುಜನಿಗೆ ಒಂಬಾತ್ತು ಲಕ್ಷ, ಗುರುವಿಗೆ ಹನ್ನೊಂದು ಲಕ್ಷ ಶನಿಗೆ ಹದಿಮೂರುವರೆ ಲಕ್ಷ ಯೋಜನ ದೂರವಿದೆ.
ಅರ್ಥ:
ಲಕ್ಕ: ಲಕ್ಷ; ಊರ್ವಿ: ಭೂಮಿ; ರವಿ: ಸೂರ್ಯ; ಪಥ: ದಾರಿ; ಶಶಿ: ಚಂದ್ರ; ಯೋಜಲ: ಅಳತೆಯ ಪ್ರಮಾಣ; ಲೆಕ್ಕಿಸು: ಎಣಿಕೆಮಾಡು, ಲೆಕ್ಕಹಾಕು; ನಕ್ಷತ್ರ: ತಾರೆ; ನವ: ಒಂಬತ್ತು; ಮಿಕ್ಕ: ಉಳಿದ; ವಸುಧ: ಭೂಮಿ; ಮಿಕ್ಕ: ಉಳಿದ;
ಪದವಿಂಗಡಣೆ:
ಲಕ್ಕ+ ಊರ್ವಿಗೆ +ರವಿಯ +ರಥ +ಶಶಿ
ಲಕ್ಕವ್+ಎರಡು+ ತ್ರಿಲಕ್ಕ+ ಯೋಜನ
ಮಿಕ್ಕಿಹವು +ನಕ್ಷತ್ರ+ ಬುಧನಿಹನ್+ಐದು+ಲಕ್ಕದಲಿ
ಲಕ್ಕವ್+ಏಳ್+ಆ+ ಶುಕ್ರ +ಕುಜ+ನವ
ಲಕ್ಕ +ಗುರು +ಹನ್ನೊಂದು +ಲಕ್ಕವು
ಮಿಕ್ಕ +ವಸುಧಾತಳಕೆ +ಶನಿ +ಹದಿಮೂರುವರೆ+ ಲಕ್ಕ
ಅಚ್ಚರಿ:
(೧) ಭೂಮಿಯಿಂದ ಬೇರೆ ಗ್ರಹಗಳ ದೂರವನ್ನು ಹೇಳುವ ಪದ್ಯ
ಕುಮಾರವ್ಯಾಸಭಾರತ 