ನಿವಗೆ ಪಾಂಡವ ಪಕ್ಷಪಾತ
ವ್ಯವಹರಣೆ ಹುಸಿ ನಾವಲೇ ಕೌ
ರವನ ಪಕ್ಷಾವೇಶಿಗಳು ಸಾಕಿನ್ನದಂತಿರಲಿ
ಎವಗೆ ಸರಿಯಿಬ್ಬರು ಗದಾಭ್ಯಾ
ಸವನು ನಮ್ಮಲಿ ಮಾಡಿದರು ತಾ
ವಿವರು ಕಾದಲಿ ನಾವು ನೋಡುವೆವೆಂದನಾ ರಾಮ (ಗದಾ ಪರ್ವ, ೬ ಸಂಧಿ, ೬ ಪದ್ಯ)
ತಾತ್ಪರ್ಯ:
ಬಲರಾಮನು ಕೃಷ್ಣನಿಗೆ ನುಡಿಯುತ್ತಾ, ಎಲೈ ಕೃಷ್ಣ, ನಿನಗೆ ಪಾಂಡವರ ಪಕ್ಷಪಾತವಿರುವುದು ಸುಳ್ಳು, ನಾವು ಕೌರವ ಪಕ್ಷಪಾತಿಗಳಲ್ಲವೇ? ಈ ವಿಷಯ ಹಾಗಿರಲಿ, ನಮಗೆ ಇವರಿಬ್ಬರೂ ಸರಿಸಮಾನರು; ನನ್ನಲ್ಲೇ ಗದಾಭ್ಯಾಸವನ್ನು ಮಾಡಿದವರು, ಇವರಿಬ್ಬರು ಕಾದಾಡಲಿ, ನಾವು ನೋಡುತ್ತೇವೆ ಎಂದು ಬಲರಾಮನು ನುಡಿದನು.
ಅರ್ಥ:
ನಿವಗೆ: ನಿನಗೆ; ಪಕ್ಷಪಾತ: ಭೇದ, ವಂಚನೆ; ವ್ಯವಹರಣ: ವ್ಯವಹಾರ, ಉದ್ಯೋಗ; ಹುಸಿ: ಸುಳ್ಳು; ಸಾಕು: ನಿಲ್ಲು; ಎವಗೆ: ನನಗೆ; ಸರಿ: ಸಮಾನ; ಗದ: ಮುದ್ಗರ; ಅಭ್ಯಾಸಿ: ವಿದ್ಯಾರ್ಥಿ; ಕಾದು: ಹೋರಾಡು; ನೋಡು: ವೀಕ್ಷಿಸು;
ಪದವಿಂಗಡಣೆ:
ನಿವಗೆ +ಪಾಂಡವ+ ಪಕ್ಷಪಾತ
ವ್ಯವಹರಣೆ +ಹುಸಿ +ನಾವಲೇ +ಕೌ
ರವನ +ಪಕ್ಷಾವೇಶಿಗಳು+ ಸಾಕಿನ್+ಅದಂತಿರಲಿ
ಎವಗೆ+ ಸರಿಯಿಬ್ಬರು+ ಗದಾಭ್ಯಾ
ಸವನು +ನಮ್ಮಲಿ+ ಮಾಡಿದರು +ತಾ
ವಿವರು +ಕಾದಲಿ +ನಾವು +ನೋಡುವೆವೆಂದನಾ +ರಾಮ
ಅಚ್ಚರಿ:
(೧) ನಿವಗೆ, ಎವಗೆ – ಪ್ರಾಸ ಪದಗಳು