ಪದ್ಯ ೩೩: ಭೀಮನ ದೇಹವು ಹೇಗೆ ತೋರುತ್ತಿತ್ತು?

ಝಾಡಿಸಲು ಝಾಡಿಸಲು ಬಿಗುಹತಿ
ಗಾಢಿಸಿತು ಕೊಡಹಿದೊಡೆ ಮಿಗೆ ಮೈ
ಗೂಡಿ ಬಿಗಿದುದು ಭುಜಗವಳಯದ ಮಂದರಾದ್ರಿಯೆನೆ
ರೂಢಿಸಿದ ಭುಜಬಲದ ಸಿರಿಯ
ಕ್ಕಾಡಿತೇ ತನಗೆನುತ ಖಾಡಾ
ಖಾಡಿಯಲಿ ಕಾತರಿಸಿ ಕಳವಳಿಸಿದನು ಕಲಿಭೀಮ (ಅರಣ್ಯ ಪರ್ವ, ೧೪ ಸಂಧಿ, ೩೩ ಪದ್ಯ)

ತಾತ್ಪರ್ಯ:
ಭೀಮನು ಹಾವನ್ನು ಝಾಡಿಸಿದ ಹಾಗೆಲ್ಲಾ ಅದರ ಬಿಗಿತವು ಹೆಚ್ಚಿತು. ಹಾವು ಸುತ್ತಿದ ಮಂದರಪರ್ವತದಂತೆ ಭೀಮನ ದೇಹವು ತೋರುತ್ತಿತ್ತು. ಅಮಿತ ಭುಜಬಲವು ತನ್ನನ್ನು ಬಿಟ್ಟು ಹೋಯಿತೇ, ಶಿಥಿಲವಾಯಿತೇ ಎಂದು ಭೀಮನು ಕಳವಳಿಸಿದನು.

ಅರ್ಥ:
ಝಾಡಿಸು: ಕೊಡಹು, ಒದರು; ಬಿಗುಹು: ಗಟ್ಟಿ, ಬಿಗಿತ; ಗಾಢಿಸು: ಹೆಚ್ಚಾಗು; ಕೊಡಹು: ಒದರು; ಮಿಗೆ: ಮತ್ತು, ಅಧಿಕ; ಮೈ: ತನು; ಕೂಡು: ಜೋಡಿಸು; ಭುಜಗ: ಹಾವು; ಭುಜಗವಳಯ: ಈಶ್ವರ; ಅದ್ರಿ: ಬೆಟ್ಟ; ರೂಢಿಸು: ಹೆಚ್ಚಾಗು; ಭುಜಬಲ: ಬಾಹುಬಲ; ಸಿರಿ: ಐಶ್ವರ್ಯ; ಕಾಡು: ಪೀಡಿಸು; ಖಾಡಾಖಾಡಿ: ಮಲ್ಲಯುದ್ಧ; ಕಾತರಿಸು: ತವಕಗೊಳ್ಳು; ಕಳವಳ: ಗೊಂದಲ; ಕಲಿ: ಶೂರ;

ಪದವಿಂಗಡಣೆ:
ಝಾಡಿಸಲು +ಝಾಡಿಸಲು +ಬಿಗುಹತಿ
ಗಾಢಿಸಿತು +ಕೊಡಹಿದೊಡೆ+ ಮಿಗೆ+ ಮೈ
ಗೂಡಿ +ಬಿಗಿದುದು +ಭುಜಗವಳಯದ +ಮಂದರಾದ್ರಿಯೆನೆ
ರೂಢಿಸಿದ +ಭುಜಬಲದ +ಸಿರಿಯ
ಕ್ಕಾಡಿತೇ+ ತನಗೆನುತ +ಖಾಡಾ
ಖಾಡಿಯಲಿ +ಕಾತರಿಸಿ+ ಕಳವಳಿಸಿದನು +ಕಲಿಭೀಮ

ಅಚ್ಚರಿ:
(೧) ಉಪಮಾನದ ಪ್ರಯೋಗ – ಮೈಗೂಡಿ ಬಿಗಿದುದು ಭುಜಗವಳಯದ ಮಂದರಾದ್ರಿಯೆನೆ
(೨) ಭುಜಗವಳಯ, ಭುಜಬಲ – ಭುಜ ಪದದ ಬಳಕೆ