ಮರುದಿವಸವಲ್ಲಿಂದ ಬೆಟ್ಟದ
ಹೊರಗೆ ನಡೆತರಲಭ್ರದಲಿ ಗುಡಿ
ಯಿರಿದು ಮೆರೆದುದು ಮೇಘಮಿಂಚಿದುದಖಿಳದೆಸೆದೆಸೆಗೆ
ಬರಸಿಡಿಲ ಬೊಬ್ಬೆಯಲಿ ಪರ್ವತ
ಬಿರಿಯೆ ಬಲುಗತ್ತಲೆಯ ಬಿಂಕಕೆ
ನರರ ಕಣ್ಮನ ಹೂಳೆ ತೂಳಿತು ಮಳೆ ಮಹೀತಳವ (ಅರಣ್ಯ ಪರ್ವ, ೧೦ ಸಂಧಿ, ೨೧ ಪದ್ಯ)
ತಾತ್ಪರ್ಯ:
ಮರುದಿನ ಧರ್ಮಜನ ಸಂಗಡದಲ್ಲಿದ್ದವರೆಲ್ಲರೂ ಆ ಸ್ಥಳವನ್ನು ಬಿಟ್ಟು ಬರುತ್ತಿದ್ದರು. ಆಗ ಆಗಸದಲ್ಲಿ ಮೇಘಗಳ ಧ್ವಜ ಹಾರಿಗು, ದಿಕ್ಕು ದಿಕ್ಕುಗಳಲ್ಲೂ ಮಿಂಚು ಕಾಣಿಸಿತು. ಸಿಡಿಲಬೊಬ್ಬೆಗೆ ಪರ್ವತ ಶಿಖರಗಳು ಬಿರಿದವು. ಸುತ್ತಲೂ ಕತ್ತಲು ಕವಿಯಿತು. ಮಳೆಯು ಭೂಮಿಯನ್ನಪ್ಪಳಿಸಿತು.
ಅರ್ಥ:
ಮರುದಿವಸ: ನಾಳೆ, ಮುಂದಿನ ದಿನ; ಬೆಟ್ಟ: ಗಿರಿ; ಹೊರಗೆ: ಆಚೆ; ನಡೆ: ಚಲಿಸು; ಅಭ್ರ: ಆಗಸ; ಗುಡಿ: ಧ್ವಜ, ಬಾವುಟ; ಇರಿ: ತಿವಿ, ಚುಚ್ಚು; ಮೆರೆ: ಹೊಳೆ, ಪ್ರಕಾಶಿಸು; ಮೇಘ: ಮೋಡ; ಮಿಂಚು: ಹೊಳಪು, ಕಾಂತಿ; ಅಖಿಳ: ಎಲ್ಲಾ; ದೆಸೆ: ದಿಕ್ಕು; ಬರಸಿಡಿಲು: ಅಕಾಲದಲ್ಲಿ ಬೀಳುವ ಸಿಡಿಲು; ಬೊಬ್ಬೆ: ಆರ್ಭಟ; ಪರ್ವತ: ಗಿರಿ; ಬಿರಿ: ಸೀಳು; ಕತ್ತಲೆ: ಅಂಧಕಾರ; ಬಿಂಕ: ಗರ್ವ, ಜಂಬ; ನರ: ಮನುಷ್ಯ; ಕಣ್ಮನ: ನಯನ ಮತ್ತು ಮನಸ್ಸು; ಹೊಳೆ: ಪ್ರಕಾಶಿಸು; ತೂಳು: ಹರಡು; ಮಳೆ: ವರ್ಷ; ಮಹೀತಳ; ಭೂಮಿ;
ಪದವಿಂಗಡಣೆ:
ಮರುದಿವಸವ್+ಅಲ್ಲಿಂದ +ಬೆಟ್ಟದ
ಹೊರಗೆ +ನಡೆತರಲ್+ಅಭ್ರದಲಿ +ಗುಡಿ
ಯಿರಿದು +ಮೆರೆದುದು +ಮೇಘ+ಮಿಂಚಿದುದ್+ಅಖಿಳ+ದೆಸೆದೆಸೆಗೆ
ಬರಸಿಡಿಲ+ ಬೊಬ್ಬೆಯಲಿ +ಪರ್ವತ
ಬಿರಿಯೆ +ಬಲು+ಕತ್ತಲೆಯ +ಬಿಂಕಕೆ
ನರರ+ ಕಣ್ಮನ +ಹೂಳೆ +ತೂಳಿತು+ ಮಳೆ +ಮಹೀತಳವ
ಅಚ್ಚರಿ:
(೧) ಆಗಸದ ಚಿತ್ರಣವನ್ನು ಹೇಳುವ ಪರಿ – ಅಭ್ರದಲಿ ಗುಡಿಯಿರಿದು ಮೆರೆದುದು ಮೇಘಮಿಂಚಿದುದಖಿಳದೆಸೆದೆಸೆಗೆ ಬರಸಿಡಿಲ ಬೊಬ್ಬೆಯಲಿ ಪರ್ವತ ಬಿರಿಯೆ