ಮೇರೆಯಿಲ್ಲದ ದೇವತತಿಗಲ
ಭಾರದಿಂ ಜಗ ಜರಿವುದೆಂದಾ
ಮೇರುವಿಂಗಾನಿಸಿದ ರಜತಸ್ತಂಭವೊ ಮೇಣು
ಸಾರತ ಸುಕೃತವನು ಸಂಚಿಸಿ
ಧೀರರೈದುವ ಸತ್ಯಲೋಕದ
ದಾರಿಯೆಂಬಂದದಲಿ ಗಂಗೆಯಧಾರೆ ಮೆರೆದಿಹುದು (ಅರಣ್ಯ ಪರ್ವ, ೮ ಸಂಧಿ, ೩೩ ಪದ್ಯ)
ತಾತ್ಪರ್ಯ:
ಲೆಕ್ಕವಿಲ್ಲದಷ್ಟು ದೇವತೆಗಳ ಭಾರದಿಂದ ಮೇರುಪರ್ವತವು ಜಾರೀತು ಎಂದು ಅದಕ್ಕೆ ಆಸರೆಗಾಗಿ ಕೊಟ್ಟ ಕಂಬವೋ, ಮಹಾಪುಣ್ಯವನ್ನು ಸಂಪಾದಿಸಿದ ಧೀರರು ಸತ್ಯಲೋಕಕ್ಕೆ ಹೋಗುವ ದಾರಿಯೋ ಎಮ್ಬಂತೆ ಗಂಗಾನದಿಯ ಧಾರೆಯು ಶೋಭಿಸುತ್ತಿತ್ತು.
ಅರ್ಥ:
ಮೇರೆ: ಎಲ್ಲೆ, ಗಡಿ; ದೇವ: ಸುರರು; ತತಿ: ಗುಂಪು, ಸಮೂಹ; ಭಾರ:ಹೊರೆ; ಜಗ: ಜಗತ್ತು; ಜರಿ: ಬೆಟ್ಟದ ಇಳಿಜಾರು; ರಜತ: ಬೆಳ್ಳಿ; ಸ್ತಂಭ: ಕಂಬ; ಮೇಣ್: ಮತ್ತು; ಸಾರತರ: ಶ್ರೇಷ್ಠವಾದ; ಸುಕೃತ: ಒಳ್ಳೆಯ ಕೆಲಸ; ಸಂಚಿಸು: ಸಂಗ್ರಹಿಸು; ಧೀರ: ಶೂರ, ಪರಾಕ್ರಮ; ಐದು: ಹೋಗಿಸೇರು; ಸತ್ಯಲೋಕ: ಸ್ವರ್ಗ; ದಾರಿ: ಮಾರ್ಗ; ಗಂಗೆ: ಸುರನದಿ; ಧಾರೆ: ಪ್ರವಾಹ; ಮೆರೆ: ಹೊಳೆ, ಪ್ರಕಾಶಿಸು;
ಪದವಿಂಗಡಣೆ:
ಮೇರೆಯಿಲ್ಲದ +ದೇವ+ತತಿಗಲ
ಭಾರದಿಂ+ ಜಗ +ಜರಿವುದೆಂದ್+ಆ
ಮೇರುವಿಂಗಾನಿಸಿದ+ ರಜತಸ್ತಂಭವೊ+ ಮೇಣು
ಸಾರತ +ಸುಕೃತವನು +ಸಂಚಿಸಿ
ಧೀರರೈದುವ +ಸತ್ಯಲೋಕದ
ದಾರಿ+ಎಂಬಂದದಲಿ +ಗಂಗೆಯಧಾರೆ+ ಮೆರೆದಿಹುದು
ಅಚ್ಚರಿ:
(೧) ಉಪಮಾನದ ಬಳಕೆ – ಮೇರೆಯಿಲ್ಲದ ದೇವತತಿಗಲಭಾರದಿಂ ಜಗ ಜರಿವುದೆಂದಾ
ಮೇರುವಿಂಗಾನಿಸಿದ ರಜತಸ್ತಂಭವೊ