ಸರಸಿಜಾಸನ ವಿಷ್ಣುರುದ್ರೇ
ಶ್ವರ ಸದಾಶಿವರಾವಳೊಬ್ಬಳ
ಚರಣ ಸೇವಾಸಂಗದಲ್ಲಿಯೆ ಸುಪ್ರತಿಷ್ಠಿತರು
ಪರಮಶಕ್ತಿಯಾದವನಂಘ್ರಿಗೆ
ಶಿರವನೊಡ್ಡುವಳಾ ಪರಾತ್ಪರ
ಪರಮಶಿವನಲಿ ಸೆಣಸಿದೆವಲಾ ಶಿವ ಶಿವಾಯೆಂದ (ಅರಣ್ಯ ಪರ್ವ, ೭ ಸಂಧಿ, ೬೬ ಪದ್ಯ)
ತಾತ್ಪರ್ಯ:
ಬ್ರಹ್ಮ, ವಿಷ್ಣು, ರುದ್ರದೇವರು, ಈಶ್ವರ, ಸದಾಶಿವರೆಂಬ ಪಂಚ ಪುರುಷರು, ಪರಮ ಶಕ್ತಿಯಾದ ದೇವಿಯ ಚರಣಸೇವೆಯಲ್ಲೇ ನಿರತಉ. ಅಂತಹ ಪರಮ ಶಕ್ತಿಯೂ ಯಾರ ಪಾದಗಳಿಗೆ ತಲೆಬಾಗುವಳೋ ಅಂತಹ ಶ್ರೇಷ್ಠರಲ್ಲಿ ಅತಿ ಶ್ರೇಷ್ಠನಾದ ಪರಶಿವನಲ್ಲಿ ನಾನು ಯುದ್ಧ ಮಾಡಿದೆನೇ ಶಿವ ಶಿವಾ ಎಂದು ಕೊರಗಿದನು.
ಅರ್ಥ:
ಸರಸಿಜ: ಕಮಲ; ಸರಸಿಜಾಸನ: ಕಮಲವನ್ನು ಆಸನವನ್ನಾಗಿಸಿರುವ (ಬ್ರಹ್ಮ); ವಿಷ್ಣು: ಶೌರಿ; ರುದ್ರ: ಶಿವ; ಸದಾಶಿವ: ಶಂಕರ; ಚರಣ: ಪಾದ; ಸೇವೆ: ಪೂಜೆ, ಉಪಾಸನೆ; ಸಂಗ: ಜೊತೆ; ಪ್ರತಿಷ್ಠರು: ಶ್ರೇಷ್ಠವಾದವರು; ಪರಮ: ಶ್ರೇಷ್ಠ; ಶಕ್ತಿ: ಬಲ, ದೇವತೆ; ಅಂಘ್ರಿ: ಪಾದ; ಶಿರ: ತಲೆ; ಒಡ್ಡು: ನೀಡು; ಪರಾತ್ಪರ: ಶ್ರೇಷ್ಠನಾದವನು, ಪರಮಪುರುಷ; ಸೆಣಸು: ಜಗಳವಾಡು;
ಪದವಿಂಗಡಣೆ:
ಸರಸಿಜಾಸನ +ವಿಷ್ಣು+ರುದ್ರ
ಈಶ್ವರ +ಸದಾಶಿವರ್+ಆವಳೊಬ್ಬಳ
ಚರಣ+ ಸೇವಾ+ಸಂಗದಲ್ಲಿಯೆ+ ಸುಪ್ರತಿಷ್ಠಿತರು
ಪರಮಶಕ್ತಿಯಾದವನ್+ಅಂಘ್ರಿಗೆ
ಶಿರವನ್+ಒಡ್ಡುವಳ್+ಆ+ಪರಾತ್ಪರ
ಪರಮಶಿವನಲಿ+ ಸೆಣಸಿದೆವಲಾ+ ಶಿವ+ ಶಿವಾಯೆಂದ
ಅಚ್ಚರಿ:
(೧) ಚರಣ, ಅಂಘ್ರಿ – ಸಮನಾರ್ಥಕ ಪದ
(೨) ಪರಾತ್ಪರ, ಪರಮಶಿವ, ಪರಮಶಕ್ತಿ – ಪರ ಪದದ ಬಳಕೆ
(೩) ಪಂಚ ಮೂಲ ಪುರುಷರು – ಬ್ರಹ್ಮ, ವಿಷ್ಣು, ರುದ್ರ, ಶಿವ, ಸದಾಶಿವ
ಕುಮಾರವ್ಯಾಸಭಾರತ 