ಫಡ ದರಿದ್ರನೆ ತಾನು ತನ್ನೆಯ
ಮಡದಿಯರ ಕೆಳದಿಯರು ಸಾವಿರ
ಮಡಿ ಸುಯೋಧನ ರಾಜಭವನದ ವಾರನಾರಿಯರ
ನುಡಿಯಬೇಕೇ ಧರ್ಮಸುತ ನಿ
ಮ್ಮಡಿಗಳೊಡ್ಡಿದ ಬಳಿಕ ಗೆಲಿದವ
ರೊಡವೆಯೈಸಲೆ ಹಾಯ್ಕು ಹಾಯ್ಕೆಂದೊದರಿದನು ಶಕುನಿ (ಸಭಾ ಪರ್ವ, ೧೪ ಸಂಧಿ, ೫೫ ಪದ್ಯ)
ತಾತ್ಪರ್ಯ:
ಯುಧಿಷ್ಠಿರನು ಶಕುನಿಯ ಹಂಗಿಸುವ ಮಾತಿಗೆ ಪ್ರತಿಕ್ರಯಿಸುತ್ತಾ, ನಾನು ದರಿದ್ರನೇ, ನನ್ನ ರಾಣಿಯರ ಸಖಿಯರು, ದುರ್ಯೋಧನನ ಅಂತಃಪುರದ ವಾರನಾರಿಯರು ಸಾವಿರದಷ್ಟಿದ್ದಾರೆ ಎಂದನು, ಇದಕ್ಕೆ ಶಕುನಿಯು, ಅಲ್ಲವೇ ನಿಮ್ಮಪಾದ, ಪಣವನ್ನೊಡ್ಡಿದ ಮೇಲೆ ಅವರು ಗೆದ್ದವರ ಆಸ್ತಿಯಾಗುತ್ತಾರೆ, ದಾಳವನ್ನು ಹಾಕು ಎಂದು ಕೂಗಿದನು.
ಅರ್ಥ:
ಫಡ: ತಿರಸ್ಕಾರ ಹಾಗೂ ಕೋಪಗಳನ್ನು ಸೂಚಿಸುವ ಒಂದು ಮಾತು; ದರಿದ್ರ: ಹೀನವಾದ, ಕೆಟ್ಟ; ಮಡದಿ: ಹೆಂಡತಿ; ಕೆಳದಿ: ಗೆಳತಿ, ಸ್ನೇಹಿತೆ; ಸಾವಿರ: ಸಹಸ್ರ; ಮಡಿ: ಪಟ್ಟು; ರಾಜಭವನ: ಅರಮನೆ; ವಾರನಾರಿ: ವೇಶ್ಯೆ; ನಾರಿ: ಹೆಣ್ಣು; ನುಡಿ: ಮಾತು; ನಿಮ್ಮಡಿ: ನಿಮ್ಮ ಪಾದ; ಒಡ್ಡು: ಪಣಕ್ಕೆ ಹಾಕು; ಬಳಿಕ: ನಂತರ; ಗೆಲಿ: ಗೆಲುವು, ಜಯ; ಒಡವೆ: ಆಭರಣ; ಐಸಲೆ: ಅಲ್ಲವೇ; ಹಾಯ್ಕು: ಹೂಡು; ಒದರು: ಹೇಳು;
ಪದವಿಂಗಡಣೆ:
ಫಡ +ದರಿದ್ರನೆ +ತಾನು +ತನ್ನೆಯ
ಮಡದಿಯರ+ ಕೆಳದಿಯರು +ಸಾವಿರ
ಮಡಿ +ಸುಯೋಧನ+ ರಾಜಭವನದ+ ವಾರನಾರಿಯರ
ನುಡಿಯಬೇಕೇ+ ಧರ್ಮಸುತ +ನಿ
ಮ್ಮಡಿಗಳ್+ಒಡ್ಡಿದ +ಬಳಿಕ +ಗೆಲಿದವರ್
ಒಡವೆ+ಐಸಲೆ +ಹಾಯ್ಕು +ಹಾಯ್ಕೆಂದ್+ಒದರಿದನು +ಶಕುನಿ
ಅಚ್ಚರಿ:
(೧) ನುಡಿ, ನಿಮ್ಮಡಿ – ಪ್ರಾಸ ಪದ
(೨) ಗೆದ್ದವರ ಸ್ವತ್ತು ಎಂದು ಹೇಳಲು – ಗೆಲಿದವರೊಡವೆ ಪದದ ಬಳಕೆ